Julián Álvarez mund të jetë gati për një transferim te Barcelona, teksa kërkon të fitojë më shumë tituj. Atletico Madridi pritet të ketë një sfidë të madhe për ta mbajtur liderin e saj në sulm.
Sipas “The Touchline”, duke cituar gazetarin Hugo Bolassone, sulmuesi 26-vjeçar i Atletico Madridit dhe Argjentinës është i gatshëm të pranojë ofertën e Barcelonës gjatë afatit kalimtar të verës.
Raportohet se Álvarez ka vendosur të largohet nga Madridi drejt Katalonjës, duke besuar se te Barcelona do të ketë më shumë shanse për të fituar trofe.
Atletico nuk dëshiron ta lërë të largohet, por e kupton se nëse vetë lojtari kërkon transferimin, do të jetë shumë e vështirë ta mbajë.
Barcelona pritet të paguajë rreth 70 milionë euro për kartonin e tij.
Pavarësisht interesimit konkret nga Arsenali, argjentinasi ka vendosur të qëndrojë në Spanjë, por të kalojë te një klub tjetër.
Këtë sezon, Álvarez ka luajtur 35 ndeshje për “Los Colchoneros”, duke shënuar 13 gola dhe dhënë 6 asistime. Kontrata e tij me klubin zgjat deri në vitin 2031, ndërsa vlera e tij në treg vlerësohet rreth 100 milionë euro nga Transfermarkt.
