Drejtuesja politike e Partisë Demokratike për diasporën, Jozefina Topalli, ka reaguar në rrjetet sociale duke akuzuar Partinë Socialiste për manipulimin e votave të emigrantëve në zgjedhjet e 11 majit.
Ajo e konsideron rezultatin e PS-së si të tejskajshëm dhe të pabesueshëm, duke thënë se “turpëron edhe Putinin”.
“Putini i merr zakonisht 75-80% të votave, por lë pak hapësirë për atë që ai e quan ‘demokraci të kontrolluar’. Këtu kemi të bëjmë me një farsë totale,” shkruan Topalli në postimin e saj.
Pas përfundimit të numërimit të votave të diasporës për të 12 qarqet e vendit, rezulton se Partia Socialiste ka marrë 121,815 vota (61.11%), ndërsa koalicioni PD-Aleanca për Shqipërinë Madhështore është renditur i dyti me 46,954 vota (23.56%).
Topalli ironizon: “Ky është vetëm një nga rezervuarët e votave të diasporës ku pushteti gdhend 90%. Një rezultat i tillë mund të ndodhë vetëm në Korenë e Veriut. Madje, as inteligjenca artificiale me algoritme manipulimi nuk do ta arrinte këtë rezultat.”
