Drejtori i Kufirit dhe Migracionit, Saimir Boshnjaku ka dhënë dorëheqjen pasditen e së hënës.
Rreth orës 16:00 kërkesa e tij, është depozituar në zyrën e kreut të Policisë Ilir Proda.
Boshnjaku argumenton se kërkon të largohet për arsye personale.
Kush është Saimir Boshnjaku
Boshnjaku ka përfunduar studimet pranë Akademisë Ushtarake të Forcave Tokësore “Skëndërbej” në vitin 1992, kur u diplomua Oficer në Degën e Këmbësorisë. Gjatë periudhës 1993-1998, ka përfunduar studimet pranë Akademisë së Policisë, kur është diplomuar Oficer Policie.
Në vitin 2011 përfundoi studimet post master në fushën e sigurisë (DND).
Në vitin 2021 ka përfunduar studimet të nivelit Bachelor, në Fakultetin e Drejtësisë, pranë Universitetit të Tiranës.
Boshnjaku ka filluar karrierën e tij pranë Gardës së Republikës, në muajin korrik të vitit 1992, ku ka shërbyer deri në vitin 2002. Gjatë karrierës së tij në Gardën e Republikës, Boshnjaku ka shërbyer në funsione të ndryshme drejtues si Komandat Toge, Komandat Kompanie, Specialist/Kordinator në Degën e Ruajtjes së Personaliteteve të Larta Shtetërore (për delegacionet e huaja), Oficer Shoqërues Personal në Degën e Ruajtjes së Personaliteteve të Larta Shtetërore.
Në muajin mars të vitit 2002, Boshnjaku filloi karrierën e tij në Policinë e Shtetit si Inspektor i Zyrës Rajonale të Luftës Kundër Trafiqeve të Paligjshme, në Drejtorinë e Policisë së Qarkut, Tiranë, deri në muajin prill të vitit 2004.
Në vijim ai ka mbajtur detyra të ndryshme drejtuese, si: Kryekontrollor, në Komisariatin e Policisë Kufitare dhe Port Durrës (Prill 2004 – nëntor 2004, Komandant Grupi, në Komisariatin e Policisë Fier (Nëntor 2004 – mars 2006), Shef i Sektorit për Trajtimin e të Huajve dhe Migracionit, në Drejtorinë e Policisë Kufitare dhe Migracionit në Drejtorinë e Përgjithshme të Policisë së Shtetit (Prill 2006 – dhjetor 2007), Drejtor i Drejtorisë Rajonale për Kufirin dhe Migracionin Tiranë (Dhjetor 2007 – qershor 2010), Drejtor i Qendrës së Mbyllur për të Huajt, në Departamentin për Kufirin dhe Migracionin (Qershor 2010 – korrik 2010), Drejtor i Drejtorisë Rajonale për Kufirin dhe Migracionin Durrës (Korrik 2010 – dhjetor 2011), Drejtor i Drejtorisë Rajonale për Kufirin dhe Migracionin Tiranë (Dhjetor 2011 – tetor 2012), Specialist/Kordinator në Drejtorinë e Studimeve Strategjike dhe Botimeve, në Drejtorinë e Përgjithshme të Policisë Shtetit (Tetor 2012 – korrik 2013), Zëvëndësdrejtor për Sigurinë Publike dhe Shef i Sektorit të Sigurisë Publike, në Drejtorinë e Policisë së Qarkut Gjirokastër (Korrik 2013 – nëntor 2014), Shef i Sektorit të Shërbimeve Operacionale dhe Hetimit, në Drejtorinë Rajonale për Kufirin dhe Migracionin Tiranë (Dhjetor 2013 – nëntor 2014), Specialist në Sektorin e Imigracionit në Drejtorinë e Migracionit, në Departamentin për Kufirin dhe Migracionin (Nëntor 2014 – tetor 2021) dhe Drejtor i Drejtorisë Vendore për Kufirin dhe Migracionin Tiranë (Tetor 2021- korrik 2022).
Saimir Boshnjaku mori detyrën e Drejtorit të Departamentit për Kufirin dhe Migracionin, në Drejtorinë e Përgjithshme të Policisë së shtetit në datën 20 korrik 2022.
