Aventura e James Rodriguez te Minnesota United duket se po shkon drejt fundit pas një periudhe të shkurtër dhe jo shumë të suksesshme në MLS.
Sipas raportimeve nga Apple TV dhe The Athletic, ylli kolumbian pritet të largohet javën e ardhshme për t’iu bashkuar kombëtares së Kolumbisë për Kupën e Botës dhe nuk pritet të rikthehet më te Minnesota pas turneut.
Mesfushori 34-vjeçar ka zhvilluar vetëm pak ndeshje me klubin amerikan, duke mos arritur të ketë ndikimin që pritej. Minnesota kishte mundësinë të zgjaste kontratën e tij deri në fund të sezonit, por vendimi duhej të merrej para 1 qershorit dhe duket se e ardhmja e lojtarit nuk është më e lidhur me klubin.
Sipas raportimeve, ndeshja ndaj Colorado Rapids mund të jetë e fundit e James Rodriguez në nivel klubesh, nëse ai aktivizohet. Mediat në Kolumbi shkruajnë se ish-ylli i Real Madrid po mendon të tërhiqet nga futbolli pas Botërorit 2026.
Te Minnesota, James nuk arriti të bëhej protagonist. Ai ka luajtur vetëm gjashtë ndeshje në total, ndërsa paraqitja e tij më e mirë mund të konsiderohet ajo ndaj LAFC më 25 prill, ku qëndroi në fushë për 63 minuta në humbjen 1-0.
Karriera e James Rodriguez ka pasur një kontrast të madh mes kombëtares dhe klubeve. Që pas shpërthimit në Botërorin 2014, ai ka shkëlqyer shpesh me Kolumbinë, por nuk ka arritur të mbajë të njëjtin nivel në shumë prej klubeve ku ka luajtur.
Pas eksperiencave te Real Madrid, Everton, Al-Rayyan, Leon dhe tani Minnesota United, e ardhmja e tij mbetet e paqartë. Botërori 2026 mund të jetë skena e fundit e madhe për një nga emrat më të njohur të futbollit kolumbian.
