Përsëri gazetarë të vrarë nga sulmet izraelite. Rreth 20 persona, përfshirë pesë gazetarë që punonin për mediat ndërkombëtare, raportohet se janë vrarë këtë të hënë, më 25 gusht, në një sulm izraelit ndaj një spitali në pjesën jugore të Rripit të Gazës.
Televizioni Zyrtar i Palestinës raportoi se mes të vdekurve ishte kameramani i tij, Hussam al-Masri, i cili gjithashtu punonte për agjencinë e lajmeve “Reuters“. Sipas asaj që raportoi më pas “Reuters“, kameramani u vra në sulmin ndaj spitalit ndërsa po transmetonte në transmetim “live” imazhet e sulmit të parë. Si pasojë, imazhet u ndalën papritur.
Ndërsa “Al Jazeera” konfirmoi se po ashtu mes të vrarëve ishte dhe fotografi i saj, Mohammad Salama.
Një burim mjekësor i cituar nga “Anadolu Agency” gjithashtu konfirmoi vdekjen e fotoreporteres Maryam Abu Daqqa.
Fotoreporteri tjetër i “NBC“-së Moaz Abu Tahau vra gjithashtu në sulmin izraelit që kishte si objektiv spitalin.
Më vonë, “BBC” raportoi se një gazetar i pestë ka humbur jetën si pasojë e sulmit të sotëm në Spitalin Nasser nga Izraeli. Bëhet fjalë për gazetarin Ahmad Abu Aziz, i cili kishte mbetur i plagosur fillimisht por ndërroi jetë pas disa orësh për shkak të plagëve të marra, duke e çuar në pesë numrin e gazetarëve të vrarë në sulmin e kësaj të hëne.
Mbrojtja Civile Palestineze raportoi në një deklaratë se shoferi i një automjeti zjarrfikës u vra gjatë sulmit dhe se shtatë të tjerë nga ekipi i tij u plagosën ndërsa përpiqeshin të shpëtonin viktimat dhe të nxirrnin trupat.
Sipas korrespondentëve të “Anadolu Agency”, ushtria izraelite ka sulmuar katin e sipërm të ndërtesës së urgjencës, të njohur si kati “Al-Yassin”.
Më herët, Ministria e Shëndetësisë së Gazës tha në një deklaratë se tetë persona u vranë dhe disa të tjerë u plagosën në sulm. Ministria shtoi se ushtria izraelite ka goditur katin e katërt të një prej ndërtesave të kompleksit në dy sulme ajrore, duke theksuar se sulmi i dytë ndodhi ndërkohë që ekipet e shpëtimit kishin arritur për të evakuuar të plagosurit dhe për të nxjerrë të vdekurit.
Këto zhvillime vijnë pas sulmit të 10 gushtit që ndodhi në qytetin e Gazës, ku u vranë gjashtë gazetarë të “Al Jazeera”-s. Autoritetet izraelite më vonë akuzuan njërin nga të vdekurit si komandant të Hamasit, pa ofruar ndonjë dëshmi.
Që nga fillimi i luftës së Izraelit më 7 tetor 2023, të paktën 244 gazetarë dhe punonjës të mediave janë vrarë nga sulmet izraelite, sipas statistikave të “TRT World”.
Më shumë se 500 gazetarë dhe punonjës të mediave janë plagosur, zhvendosur ose detyruar të shkojnë në mërgim.
Izraeli mohon se ka pasur qëllim të drejtpërdrejtë gazetarët, por grupet mbikëqyrëse, përfshirë Reporterët pa Kufij (RSF) dhe Federatën Ndërkombëtare të Gazetarëve (IFJ), kanë dënuar atë që ata e përshkruajnë si “dhunë të pazakontë ndaj gazetarëve” dhe kërkojnë hetime ndërkombëtare të pavarura./
