Ministri i Jashtëm i Izraelit konfirmoi se trupat izraelite vranë në Gazë udhëheqësin më të lartë të Hamasit, Yahya Sinwar, një prej organizatorëve kryesorë të sulmit të vitit të kaluar ndaj Izraelit, ku u vranë mbi 1000 njerëz dhe u morën peng rreth 300 të tjerë.
Yahya Sinwar ishte në krye të listët izraelite për më të kërkuarit që nga fillimi i luftës mes Izraelit dhe Hamasit tetorin e kaluar. Eliminimi i tij përbën një goditje të fuqishme ndaj grupit militant. Deri në publikimin e këtij lajmit organizata Hamas nuk e ka konfirmuar vdekjen e udhëheqësit të saj.
Shefi i politikës së jashtme izraelite, Israel Katz, e quajti vrasjen e Yahya Sinwarit “arritje ushtarake dhe morale për ushtrinë izraelite”.
“Vrasja e Sinwarit do të krijojë mundësinë për të liruar menjëherë pengjet dhe për të sjellë një ndryshim që do të çojë në një realitet të ri në Gazë pa Hamasin dhe pa kontrollin iranian”, tha ai përmes një deklarate.
Netanyahu u drejtohet qytetarëve izraelit që Yahya Sinwar ka vdekur.
“Unë u drejtohem të gjithë atyre që mbajnë pengjet tona: kushdo që të lërë armët dhe të kthejë pengjet tanë, ne do t’i lejojmë ata të largohen dhe të jetojnë. Kushdo që dëmton pengje, do të ketë gjak në kokë dhe do të përgjigjet për këtë. Hamasi nuk do të sundojë Gazën, kjo është një mundësi për njerëzit e saj që të çlirohen nga tirania e tyre. Sot e keqja ka pësuar një goditje të rëndë, por misioni ynë ende nuk ka mbaruar. Familjeve të të rrëmbyerve u them, ky është një moment i rëndësishëm në luftë, ne do të vazhdojmë të punojmë me të gjitha forcat që ata të kthehen në shtëpi. Të dashurit tuaj. Ata janë të dashurit tanë”, u shpreh Netanyahu.
