Ideja që Italia të marrë pjesë në Kupën e Botës 2026 në vend të Iranit është konsideruar e pabazë nga FIFA. Presidenti Gianni Infantino ka qenë i qartë, duke theksuar se Irani do të marrë pjesë normalisht në turneun që zhvillohet në SHBA, Meksikë dhe Kanada.
Pavarësisht disa deklaratave kontradiktore nga vetë Irani, FIFA mbetet e bindur se nuk ka asnjë skenar alternativ. “Ata do të luajnë në Botëror. Nuk ka plan B, C apo D”, është shprehur Infantino, duke nënvizuar se sporti duhet të qëndrojë i ndarë nga politika.
Së fundmi, është përhapur një propozim nga Paolo Zampolli, i cili sugjeroi që Italia të zëvendësojë Iranin në rast të një tërheqjeje. Megjithatë, për FIFA-n kjo ide nuk ka asnjë bazë ligjore, pasi Irani e ka fituar pjesëmarrjen në fushë.
Edhe nga Italia ka pasur reagime të forta kundër këtij skenari. Ministri i Sportit, Andrea Abodi, deklaroi se një gjë e tillë “nuk është e mundur dhe as e përshtatshme”, ndërsa presidenti i CONI, Luciano Buonfiglio, shtoi se pjesëmarrja në Botëror duhet të fitohet në fushë.
Sipas rregullave të FIFA-s, në rast se një kombëtare tërhiqet, ajo përballet me gjoba të rënda financiare dhe sanksione sportive. Për më tepër, vendi vakant zakonisht i takon një skuadre nga e njëjta konfederatë, çka e bën edhe më të pamundur përfshirjen e Italisë.
