Një operacion i skuadrës antidrogë të Policisë Italiane ka çuar në sekuestrimin e një sasie të konsiderueshme droge në zonën e Pizës dhe arrestimin e një 31-vjeçari shqiptar, i dyshuar për trafik narkotikësh.
Ngjarja ndodhi në Crespina Lorenzana, ku efektivët ndaluan për kontroll një automjet që lëvizte në mënyrë të dyshimtë në rrugë dytësore, me qëllim shmangien e kontrolleve. Shoferi i makinës, një shtetas shqiptar 31 vjeç, u tregua i nervozuar dhe nuk arriti të japë një shpjegim të besueshëm për itinerarin e tij.
Dyshimet e policisë u shtuan kur, gjatë kontrollit, brenda ndarjes së pasagjerëve u gjet një distinktiv magnetik pa asnjë shenjë dalluese.
Falë përvojës në hetimin e trafikut të lëndëve narkotike dhe njohurive mbi metodat e fshehjes së drogës, agjentët arritën të zbulojnë një hapësirë të fshehtë në automjet, të aktivizuar përmes një sensori elektronik të lidhur me kartë magnetike. Brenda zgavrës së fshehur në plastikën e makinës u gjetën 6 pako kokainë, me një peshë totale prej 5.9 kilogramësh.
Kontrolli i mëvonshëm në banesën e të dyshuarit, në zonën e Cascina, çoi gjithashtu në sekuestrimin e rreth 6,800 eurove para të gatshme dhe mjeteve që shërbenin për prerjen dhe paketimin e drogës.
Hetimet vijojnë për të zbuluar nëse 31-vjeçari ishte pjesë e një rrjeti më të gjerë trafiku ndërkombëtar të lëndëve narkotike.
