Ditën e djeshme një nënë me djalin e saj autik, u prekën nga uji me piper që hodhi policia, pas tensioneve në protestë.
Ajo ka deklaruar pas ngjarjes se ka qenë duke ikur në shtëpi, pas përfundimit të terapisë së djalit.
“Isha duke ikur në shtëpi. Dua vetëm të iki në shtëpi, ata na hodhën piper syve. Dua të iki në shtëpi, unë nuk isha atje, isha terapia e djalit, më hodhën piper syve dhe ujë. Turp të kenë”, ka deklaruar ajo, pas ngjarjes.
Por ditën e sotme, kryeministri Edi Rama hodhi akuza ndaj protestuesve, duke deklaruar se ishin ata që e sollën nënë e bir të sëmurë në protestën e tensionuar.
“Një histori që e keni parë të gjithë. Atë nënën, me fëmijën me spektër autik, të cilën korbat e kishin marrë me vete te parlamenti, për ta kthyer në viktimën e policisë për të mbrojtur deputetët nga ata verbrit e dhunshëm të Shqipërisë. Ne sapo kemi dyfishuar mbështetjen për fëmijët autikë dhe për nënat e tyre. Përjetimi i asaj nëne është tjetër Ajo mund të mos jetë e informuar, ose dhe mund të jetë. Por ajo nuk e ka ndjerë kurrë empatinë tonë në fundin e atij hendeku mes faktit tonë dhe përjetimit të vetmisë së saj dëshpëruese.
Në fund të hendekut e futën sorrat dhe korbat, dorën e solidaritetit të tyre hipokrit për ta marrë me vete te Parlamenti, me të njëjtin manual që përdorin terroristët që i përdorin si mburojë teksa sulmonin me maska policinë e shtetit. E vunë para kamerave, e përdhunuan dhe e nxorën në mexhelis për t’i qarë hallin. I kthyen lotët e saj në breshër, përmes algoritmit, pastaj e lanë dhe u nisën për te mikrofoni në bulevard. Si ata skuthat e zinj që i kemi parë në përdorimin e këtij manuali që çojnë mish për top të tjerët dhe kërkojnë solidaritet për të shkretët njerëz duke mbajtur fjalime në emër të viktimave të shtetit policor”, tha ai.
Por pavarësisht këtyre deklaratave, zonja File Bulku i ka qëndruar të njëjtit version, duke theksuar që po kthehej nga terapia e djalit dhe po shkonte në shtëpi.
E gjithë situata e krijuar, historia e nënës me djalin prekën zemrat e shqiptarëve, të cilët nëpërmjet një GoFundMe, mblodhën për pak orë 151 mijë dollarë.
