Një agjenci federale e SHBA-së ka hapur zyrtarisht hetime ndaj ish-Prokurorit të Posaçëm, Jack Smith, i cili ka mbikëqyrur dy çështje penale kundër ish-presidentit amerikan Donald Trump, pas përfundimit të mandatit të tij të parë në Shtëpinë e Bardhë.
Emri i Smith është i njohur edhe për publikun shqiptar, pasi ai ishte prokurori që ngriti aktakuzën dhe çoi në burg ish-presidentin e Kosovës, Hashim Thaçi, së bashku me disa ish-krerë të Ushtrisë Çlirimtare të Kosovës.
Hetimi ndaj tij po zhvillohet nga Zyra e Këshilltarit të Posaçëm – një agjenci federale e pavarur që merret me vlerësimin e sjelljes së punonjësve federalë. Zyra ka konfirmuar për mediat se është duke hetuar nëse Smith ka shkelur ligjin që ndalon zyrtarët federalë të përdorin funksionin e tyre për qëllime politike.
Nisja e hetimeve erdhi pas një kërkese të bërë nga senatori republikan Tom Cotton. Megjithatë, kjo zyrë nuk ka autoritet për të ngritur akuza penale.
Smith dha dorëheqjen nga detyra në janar të këtij viti, pasi Trump fitoi zgjedhjet presidenciale.
Ai u bë figurë kyçe në dy raste kundër ish-presidentit Trump: njëri për mbajtje të paligjshme të dokumenteve të klasifikuara dhe tjetri për përpjekje për të përmbysur rezultatin e zgjedhjeve presidenciale të vitit 2020. Asnjë nga këto çështje nuk ka arritur në gjykim, por një prej tyre çoi në një vendim historik të Gjykatës Supreme, e cila i njohu ish-presidentëve amerikanë imunitet nga ndjekja penale për veprimet e kryera gjatë mandatit.
