Inspektoriati i Lartë i Deklarimit dhe Kontrollit të Pasurive dhe Konfliktit të Interesit, (ILDKPKI), ka gjobitur me 3 mijë euro ish ministren e Bujqësisë, Frida Krifca.
Lajmi është bërë me dije përmes një njoftimi në faqen zyrtare të Gjykatës Administrative të Tiranës, ku është kërkuar ekzekutimi i gjobës.
Sipas njoftimit të çështjes, gjoba është vendosur në 12 qershor të këtij viti dhe arsyet e saj lidhen me ligjin për parandalimin e konfliktit të interesit.
Njoftimi nuk zbulon specifikisht se për çfarë konflikti interesi bëhet fjalë për ish ministren e Bujqësisë, që tashmë punon si këshilltare në Kryeministri.
Kujtojmë se opozita ka akuzuar publikisht Frida Krifcën si përfituese e fondeve publike, përmes një prej kompanive të bashkëshortit të saj, Erti Lutaj. Sipas një denoncimi publik, të Partisë Demokratike, kompania Lucom Projects e Lutajt ka përfituar mbi 120 mijë euro nga Bashkia e Tiranës.
Nuk dihet nëse është kjo arsyeja se pse ILDKPKI e ka gjobitur ish ministren, apo ndonjë tjetër rast konflikti interesi i lidhur me vendimarrjen e saj gjatë kohës që mbante funksionin e ministres.
Frida Krifca u shkarkua nga postimi i ministres pas shpërthimit të skandalit, ku Bashkimi Europian bllokoi fondet IPARD për Shqipërinë, të cilat vijojnë ende të jenë të bllokuara, për shkak të korrupsionit, pasi fondet që duhet t’i merrnin fermerët shkonin tek biznesmenët pranë Qeverisë apo të afërmit e politikanëve.
Skandali ka të bëjë me kohën kur Frida Krifca ishte drejtuese e Agjencisë për Zhvillim Bujqësor dhe Rural (AZHBR), institucioni i cili kishte përgjegjësi për ndarjen e fondeve.
