Një ngjarje tragjike ka ndodhur mbrëmjen e sotme në Tolentino, provinca e Maceratës në Itali, ku një grua shqiptare ka humbur jetën si pasojë e një sulmi me thikë. Mediat italiane raportojnë se viktima është 45-vjeçarja Gentiana Hudhra, e cila u godit për vdekje në rrugë nga ish-bashkëshorti i saj.
Krimi ndodhi në sy të kalimtarëve, pranë një parku në qytet, pikërisht në zonën ku viktima kalonte çdo ditë për të shkuar në punë. Autori i dyshuar, 55-vjeçari Nikollaq Hudhra, pas sulmit është ndaluar nga policia në vendngjarje, ku u gjet i ulur në një stol pranë trupit të pajetë të ish-gruas. Ai është arrestuar menjëherë nga autoritetet.
Sipas raportimeve, autori fillimisht e ka goditur Gentianën me thikë dhe më pas e ka shkelmuar. Ai ka deklaruar se “ka bërë atë që duhej”, duke tronditur opinionin publik me ftohtësinë e këtij akti të rëndë.
Gentiana Hudhra ishte nënë e dy fëmijëve të rritur. Dëshmitarët dhe klientët e lokaleve përreth dëgjuan britmat dhe njoftuan menjëherë shërbimet emergjente, por për fat të keq, kur ambulanca mbërriti, ajo kishte ndërruar jetë. Përpjekjet për ta shpëtuar rezultuan të kota.
