Ish-ambasadori britanik në SHBA, Lord Peter Mandelson, ka deklaruar se presidenti amerikan Donald Trump nuk do të përdorë forcën ushtarake për të marrë Groenlandën.
Në një intervistë për BBC, Mandelson shprehu admirim për qasjen direkte të Trump në politikë, por theksoi se presidenti nuk është budalla dhe se këshilltarët e tij do ta paralajmëronin për rreziqet që një veprim i tillë do të sillte për interesin kombëtar amerikan.
Deklaratat e Mandelson vijnë pas rikthimit të vëmendjes nga Trump mbi Groenlandën, ku ai sugjeroi se SHBA duhet ta “zotërojë” këtë territor për të frenuar ndikimin e Rusisë dhe Kinës. Kjo ka nxitur një reagim të fortë nga Danimarka dhe Groenlanda, të cilat kanë theksuar se territori nuk është në shitje, ndërsa Kopenhaga ka paralajmëruar se çdo veprim ushtarak do të kërcënonte stabilitetin e NATO-s.
Lidhur me çështjen, sekretari amerikan i Shtetit, Marco Rubio, do të zhvillojë bisedime me autoritetet daneze javën e ardhshme për çështjen e Groenlandës.
Një sondazh në Danimarkë ka treguar se 38% e qytetarëve besojnë se SHBA mund të ndërmarrë një sulm nën administratën Trump.
Mandelson vuri në dukje se Arktiku po bëhet një rajon gjithnjë e më i kontestuar dhe se SHBA do të ketë rol udhëheqës në përpjekjet për sigurinë në këtë zonë strategjike.
Ai nënvizoi se Groenlanda ka rëndësi të madhe për sistemet e paralajmërimit të hershëm mbi raketat dhe mbikëqyrjen ushtarake, si dhe për burimet natyrore që po dalin në pah për shkak të shkrirjes së akullit.
Aleatët e NATO-s kanë dalë në mbështetje të pozitës daneze, duke theksuar se vetëm Danimarka dhe Groenlanda kanë të drejtën të vendosin për të ardhmen e territorit të tyre. Këto zhvillime tregojnë tensionet e rritura në Arktik dhe sfidat që ndërlidhen me ndikimin e fuqive të mëdha në këtë rajon.
