Irani i është përgjigjur presidentit të SHBA, Donald Trump, i cili deklaroi më herët se iranianët duan të vizitojnë “Shtëpinë e Bardhë” për të folur për fundin e luftës me Izraelin.
Në reagimin e misionit diplomatik të Iranit në Kombet e Bashkuara në Nju Jork, thuhet se asnjë iranian nuk do të përulet para portave të Shtëpisë së Bardhë.
“Asnjë zyrtar iranian nuk ka kërkuar të përulet para portave të Shtëpisë së Bardhë. E vetmja gjë më e përçmueshme se gënjeshtrat e tij është kërcënimi i tij frikacak për të ‘rrëzuar’ Udhëheqësin Suprem të Iranit”, thuhet në postimin e misionit iranian sipas BBC.
Kjo i referohet pretendimit të fundit të Trump se SHBA-të e dinë se ku është Udhëheqësi Suprem i Iranit, por nuk duan që ai të dëmtohet “për momentin”.
Postimi thotë gjithashtu se Irani nuk negocion “nën presion” dhe do t’i përgjigjet çdo kërcënimi me një kundërkërcënim, dhe çdo veprimi me masa reciproke.
