Pas fitores së vuajtur 2-1 ndaj Udinese dhe në pritje të ndeshjes Napoli-Milan, që përfundoi me të njëjtin rezultat në favor të bluve, Interi e zgjeroi përkohësisht diferencën në renditjen aktuale të Serie A. Në përfundim të takimit, Simone Inzaghi foli për “Sky Sport”, duke analizuar ndeshjen mes kënaqësisë për pjesën e parë dhe keqardhjes për menaxhimin e fundit të lojës:
“Bëmë një pjesë të parë të shkëlqyer, mund të shënonim më shumë se dy gola. Pastaj në të dytën ramë, veçanërisht pas golit të Solet, ku humbëm distancat. U zemërova, kartoni i kuq ishte i drejtë, bëra gabim. Faulli ndaj Correa, para këndores që solli golin, më bëri të humb durimin. Adrenalina më bëri një shaka të keqe, në Parma nuk do të jem”.
Goli i pësuar mund të ishte evituar…
Po, por nuk do të kisha ndryshuar asgjë. Katër ndërrime ishin të detyruara: Arnautovic dhe Frattesi morën goditje dhe kërkuan të zëvendësoheshin, Dimarco dhe Darmian po ktheheshin nga dëmtimi, ndërsa Calhanoglu kishte luajtur dy ndeshje nga 90 minuta me Turqinë. Pas dy ditësh kemi Milanin, Asllani është i skualifikuar dhe kemi nevojë për Hakan. Ta lija të luante 4 ndeshje nga 90 minuta në pak ditë do të ishte rrezik. Kisha 5 lojtarë të duhur në stol, De Vrij ishte aty vetëm për formalitet. Shpresojmë të rikuperojmë disa lojtarë, sepse duke luajtur çdo 72 orë është e vështirë.
Sommer ishte fantastik në fund, por mungoi menaxhimi i ndeshjes. Ka ndonjë arsye tjetër pas këtyre vështirësive?
E humbëm qartësinë pas golit të tyre, nuk luajtëm më. Më pëlqen t’i ndaj me ju vështirësitë, por do të kisha dashur të ndaj edhe pjesën e parë të shkëlqyer që patë, si një ekip i madh. Udinese ka vënë në vështirësi shumë ekipe, në futboll ka edhe kundërshtarë. Pas golit të tyre na mungoi qartësia dhe hymë në vështirësi.
Marotta tha se rinovimi yt është një formalitet…
Unë ndihem mirë tek Interi, ndihem i vlerësuar nga klubi dhe kam një raport të shkëlqyer me lojtarët. Siç kemi bërë çdo sezon, në fund do të shohim çfarë do të ndodhë. Gjithsesi, ka një harmoni të madhe mes nesh.
