Interi dha një tjetër mesazh të fortë në garën për titull, duke mposhtur Sassuolon 5-0 në “Mapei Stadium” në javën e 24-t të Serie A. Nerazzurrët e dominuan plotësisht takimin dhe e mbyllën pa asnjë diskutim, duke zgjatur serinë pozitive në kampionat në 11 ndeshje pa humbje.
Ndeshja u zhbllokua shpejt, me Bisseck që shënoi në minutën e 11-të pas asistit të Dimarcos, ndërsa Thuram dyfishoi në minutën e 28-të, sërish me Dimarcon protagonist në asist. Sassuolo mendoi se kishte rihapur sfidën, por goli i Thorstvedt u anulua për pozicion jashtë loje.
Në pjesën e dytë, Interi e thelloi edhe më shumë avantazhin: Lautaro Martinez realizoi për 0-3 në minutën e 50-të, më pas Akanji shënoi të katërtin në minutën e 54-të (asist Dimarco), ndërsa Louis Henrique vendosi pikën mbi “i” në minutën e 89-të për 0-5. Sassuolo pati edhe një moment të vështirë me Matic, i cili u ndëshkua dhe do të humbasë ndeshjen e radhës.
Me këtë fitore të thellë, Interi vazhdon marshimin në kampionat dhe synon të ruajë diferencën në krye, duke ushtruar presion maksimal ndaj rivalëve.
