Inter po përgatit një verë me shumë lëvizje në merkato. Drejtuesit zikaltër po punojnë për të rinovuar disa reparte të skuadrës, me fokus kryesor mbrojtjen dhe mesfushën.
Në prapavijë pritet të vijnë të paktën dy lojtarë të rinj, pasi disa emra si Acerbi, Darmian dhe ndoshta De Vrij mund të largohen. Edhe situatat e Bisseck dhe Carlos Augusto do të vlerësohen, pasi të dy mund të shqyrtojnë të ardhmen e tyre nëse nuk kanë më shumë hapësira.
Në mesfushë, emri kryesor mbetet Manu Koné. Lojtari i Roma pëlqehet shumë nga Inter për karakteristikat fizike dhe intensitetin që mund t’i japë skuadrës. Një tjetër mundësi mbetet Curtis Jones nga Liverpool.
Davide Frattesi pritet të largohet në verë. Italiani ka luajtur pak këtë sezon dhe nuk ka pasur ndikimin e viteve të kaluara. Çmimi i tij vlerësohet rreth 25 milionë euro dhe ofertat për të nuk pritet të mungojnë.
E ardhmja e Mkhitaryan mbetet ende e hapur. Kontrata e tij skadon në qershor dhe palët pritet të flasin në ditët në vijim, edhe pse tërheqja nga futbolli shihet si një mundësi reale.
Në portë, Josep Martínez duket i destinuar të marrë një rol më të rëndësishëm, por Inter gjithsesi do të kërkojë edhe një portier tjetër për ta shoqëruar spanjollin.
Sa i përket mbrojtjes, objektivat kryesorë janë Solet i Udinese dhe Muharemovic i Sassuolo. Nuk përjashtohet mundësia që të dy të transferohen te Inter, pasi klubi kërkon më shumë forcë dhe alternativa në repartin defensiv.
Merkatoja e Inter pritet të jetë aktive, me largime të rëndësishme dhe afrime të menduara për t’i dhënë Chivu një skuadër më të balancuar për sezonin e ardhshëm.
