Pas tri humbjesh radhazi brenda një jave – të gjitha pa shënuar asnjë gol – Interi i Simone Inzaghit ndodhet në një moment delikat, pikërisht kur afron sfida vendimtare në Ligën e Kampioneve. Lodhja fizike dhe mendore duket se ka ndikuar ndjeshëm në performancën e skuadrës, e cila tani duhet të reagojë me urgjencë.
Përballja e radhës në Barcelonë është afër dhe nuk ka më hapësirë për pasiguri apo gabime. Duhet të rikthehet qetësia mendore dhe gjendja optimale fizike për të përballuar ndeshjet që vijnë. Asgjë nuk është e humbur, por për të ndryshuar këtë situatë, kërkohet një qasje krejt tjetër në fushë.
Fjalët e Inzaghit në konferencën për shtyp:
A prisnit kaq shumë mungesa në lojë?
“Në pjesën e parë nuk bëmë lojën tonë. Kishim distanca të mëdha dhe pa presion, dhe kjo na kushtoi. Goli ishte një episod rastësor, por Roma zhvilloi një ndeshje të madhe. Në pjesën e dytë dhamë gjithçka për të barazuar dhe besoj se tifozët tanë e kuptuan. Duartrokitjet në fund ishin të këndshme, por nuk na bëjnë ta harrojmë këtë humbje të hidhur. Ka ndeshje përpara dhe duhet të mendojmë për atë pas 72 orësh në Barcelonë.”
Çfarë duhet për t’u rikuperuar deri të mërkurën? Thuram do të grumbullohet?
“Nuk e di. Duhet gjithçka: pushim, rikuperim. Nuk ka kuptim të flasim për atë që mund të ishte. E dinim kalendarin dhe e donim këtë rrugëtim. Lojtarët kanë gjithmonë mirënjohjen time sepse po japin gjithçka.”
Ka ngjashmëri me atë që ndodhi para dy vitesh që ju bëjnë optimist?
“Po, absolutisht. Nuk kishim nevojë të shihnim Barcelonën për të kuptuar me kë kemi të bëjmë. Dy vite më parë nuk ishim në lojë për tre kompeticione. Tani duhet të ecim përpara me besim, duke shpresuar të rikuperojmë lojtarët që na mungojnë.”
Si të riktheheni për kaq pak kohë?
“Në pjesën e dytë ishim të bashkuar dhe bëmë lojën që duhej të kishim bërë që në fillim. Po ta kishim hapur më herët, çdo gjë mund të ndodhte. Duhet të jemi të zotë të bëjmë lojë skuadre, kundër një ekipi të madh, me shumë respekt por pa frikë.”
Ka diçka që nuk shkon me gjykimin në këto ndeshje të fundit?
“Do të ishte shumë e lehtë të flisnim për këtë. Duhet të fokusohemi për të kuptuar pse ndodhin këto gjëra.”
Pse pati kaq shumë vështirësi në pjesën e parë?
“Sigurisht që vlera e kundërshtarit ndikon. Roma nuk kishte humbur në 17 ndeshje. Pastaj pati mungesë qartësie në presion dhe në vendimet tona.”
