Një lajm i bujshëm vjen nga Argjentina. Sipas TyC Sports, Inter po përgatitet t’i ofrojë 58 milionë euro Real Madridit për Nico Paz, mesfushorin argjentinas të Como-s. Arsyeja? “Los Blancos” kanë të drejtën ta riblejnë lojtarin për vetëm 10 milionë euro gjatë verës së ardhshme, falë një klauzole të veçantë.
Interi e ka ndjekur prej kohësh talentin 20-vjeçar dhe interesimi nuk është sekret. Zëvendëspresidenti Javier Zanetti madje ka darkuar me babain e tij një vit më parë — të dy kanë luajtur bashkë në kombëtaren e Argjentinës. Klubi zikaltër thuhet se ka krijuar kontakte të drejtpërdrejta me përfaqësuesit e lojtarit për të arritur një marrëveshje sa më shpejt, duke tentuar të parakalojë konkurrencën dhe të bindë Realin.
Nico Paz po kalon një formë të shkëlqyer te Como, me 4 gola dhe 4 asiste në këtë fillim sezoni. Skuadra lombarde ka humbur vetëm një ndeshje në kampionat, ndërsa lojtari është shndërruar në liderin e mesfushës.
I lindur në vitin 2004, Paz shënoi 6 gola në Serie A sezonin e kaluar dhe këtë vit ka arritur tashmë kuotën e 4 golave deri në tetor. Ai ka zhvilluar 5 ndeshje me Argjentinën dhe shihet si një nga talentet më premtues të brezit të ri.
