Inter ka fituar Kupën e Italisë për herë të 10-të në histori, pas fitores 2-0 ndaj Lazio në finalen e luajtur në “Olimpico” të Romës. Zikaltërit e Cristian Chivu e vendosën ndeshjen që në pjesën e parë, falë një autogoli të Marusic dhe golit të kapitenit Lautaro Martinez.
Ndeshja u zhbllokua në minutën e 13-të, pas një goditjeje dënimi të rrezikshme nga Dimarco. Topi u devijua fillimisht nga Thuram dhe më pas përfundoi në rrjetë pas ndërhyrjes së gabuar të Marusic, i cili shënoi në portën e tij.
Inter nuk u ndal dhe në minutën e 35-të gjeti edhe golin e dytë. Tavares gaboi në krah, Dumfries përfitoi menjëherë dhe shërbeu në zonë për Lautaro Martinez. Kapiteni zikaltër nuk fali nga afërsia dhe e çoi rezultatin në 2-0, duke arritur në kuotën e 23 golave sezonalë.
Lazio, që kishte Kupën e Italisë si mundësinë e fundit për të shpëtuar sezonin dhe për të siguruar një vend në Europë, nuk arriti të reagonte si duhet. Skuadra e Sarri pati shumë vështirësi në ndërtimin e lojës dhe krijoi pak rrezik për portën e Inter.
Rasti më i mirë për kryeqytetasit erdhi në minutën e 76-të, kur Dia provoi me të majtën, por portieri Martinez u përgjigj saktë dhe mbajti portën të paprekur.
Inter, nga ana tjetër, e menaxhoi me qetësi avantazhin. Zikaltërit nuk shfaqën domosdoshmërisht lojën më spektakolare, por treguan organizim, përqendrim dhe efikasitet në momentet vendimtare.
Për Cristian Chivu, ky është një sukses i madh, pasi arrin të fitojë Kupën e Italisë që në tentativën e parë në krye të Inter. Në një stadium të mbushur dhe në një atmosferë finaleje, zikaltërit e mbyllën mbrëmjen me trofe, duke konfirmuar edhe një herë forcën e tyre në futbollin italian.
