Kupa e Botës mund të zgjerohet sërish. Presidenti i FIFA-s, Gianni Infantino, ka konfirmuar se një nga idetë që po diskutohet është rritja e numrit të skuadrave pjesëmarrëse në Botërorin 2030, nga 48 në 64 kombëtare.
Turneu i vitit 2030 do të zhvillohet në Spanjë, Portugali dhe Marok, ndërsa Argjentina, Uruguai dhe Paraguai do të jenë gjithashtu pjesë e organizimit me ndeshje simbolike. Sipas raportimeve, propozimi për zgjerimin e turneut po shtyhet kryesisht nga drejtues të CONMEBOL-it dhe mund të diskutohet në mbledhjet e ardhshme të FIFA-s.
Infantino pranoi se çështja është në shqyrtim dhe theksoi se futbolli duhet t’u japë mundësi sa më shumë vendeve të ëndërrojnë pjesëmarrjen në Kupën e Botës.
“Është një temë që është shqyrtuar dhe debatuar në komitetet përkatëse. Kur organizon një Botëror, është e rëndësishme ta mendosh për të gjithë, jo vetëm për Europën dhe Amerikën e Jugut. Çdo komb duhet të ketë mundësinë të ëndërrojë pjesëmarrjen”, u shpreh presidenti i FIFA-s.
Sipas tij, kalimi nga 32 në 48 skuadra ka rezultuar pozitiv dhe niveli i kombëtareve është rritur ndjeshëm në të gjithë botën.
“Niveli i skuadrave është shumë i lartë dhe vazhdon të përmirësohet në mbarë botën. Nëse vendeve më të vogla nuk u jepet mundësia të marrin pjesë, ato nuk do të kenë më motivim për t’u përmirësuar”, shtoi Infantino.
Ideja për një Botëror me 64 skuadra mbetet ende në fazë diskutimi, por pritshmëritë pozitive nga formati me 48 ekipe kanë hapur rrugën për një debat të ri brenda FIFA-s.
Vendimi përfundimtar mund të marrë formë në vitet e ardhshme, ndërsa marsi i vitit 2027 shihet si një moment i rëndësishëm, kur FIFA do të mbajë kongresin në Marok dhe do të zhvillohen edhe zgjedhjet presidenciale.
Nëse miratohet, Botërori 2030 do të bëhej turneu më i madh në historinë e futbollit, me 64 kombëtare në garë për trofeun më të rëndësishëm në botë.
