Gjykata e Lartë ka vendosur të rikthejë për rishqyrtim në Apelin e GJKKO-së kërkesën e kreut të Partisë së Lirisë, Ilir Meta, lidhur me ndryshimin e masës së sigurisë.
Ish-presidenti kishte kërkuar zëvendësimin e masës “arrest me burg” me një masë më të lehtë, por kjo kërkesë ishte rrëzuar më herët nga Gjykata e Posaçme e Apelit për Korrupsionin dhe Krimin e Organizuar.
Me vendimin e fundit, Gjykata e Lartë ka prishur vendimin e Apelit, duke urdhëruar që çështja të shqyrtohet sërish nga i njëjti trup gjykues.
Ndërkohë, theksojmë se një tjetër vendim është marrë ndaj ccështjes së ish-presidentit Meta. Burime për mediat bëjnë me dije se togat e zeza kanë vendosur të rrëzojnë kërkesën e tij për prishjen e pezullimit të afateve të paraburgimit.
Kujtojmë që Gjykata e Posaçme vendosi në 18 Mars që të kalojë për gjykim dosjen në ngarkim të tij, ish bashkëshortes Monika Kryemadhi, nënës së kësaj të fundit Fatime Kryemadhi, Pirro Xhixho dhe Ema Çoku.
Ilir Meta ndodhet në paraburgim që prej tetorit 2024. Ish-presdenti po hetohet për 3 çështje aferën CEZ-DIA, lobimin e LSI-së në SHBA dhe hetimin pasuror. Aktualisht SPAK ka mbyllur hetimet dhe dosja e tij është dërguar për gjykim.
Ilir Meta dhe Monika Kryemadhi akuzohen për korrupsion pasiv, pastrim parash dhe mosdeklarim pasurie.
