Nga një telenovelë në një luftë gjyqësore (dhe mediatike), kalimi është i menjëhershëm, mjafton të shohësh çfarë po ndodh mes Wanda Nara dhe Mauro Icardi. Sulmuesi argjentinas i Galatasaray, ish-kapiteni i Interit, ka publikuar një mesazh të ashpër në rrjetet sociale, duke sulmuar ish-partneren dhe nënën e dy vajzave të tij, pas denoncimit të saj për keqtrajtim të supozuar ndaj njërit prej fëmijëve që ajo ka me Maxi López.
Një shpërthim i fortë në Instagram, ku Icardi i ka vënë ultimatum dhe ka bërë një referencë të qartë ndaj Johnny Depp, diçka që e ka bërë shpesh muajt e fundit. “Tik, tak… Kujdes, së shpejti do të bien maskat”, – shkruan Maurito, shoqëruar me një foto të aktorit të Hollivood-it duke ngritur grushtin në shenjë triumfi.
Ai shton: “Nuk e kam të qartë nëse ajo që më denoncon për dhunë është e njëjta që më shkruan për të më kërkuar të shkoj të shoh tre fëmijët… Sepse unë i kam rritur dhe ata më thërrasin ‘baba’, fjalë për fjalë.
Është e njëjta që më ka denoncuar për dhunë gjinore, sulme, fyerje dhe posedim armësh, por dy ditë më vonë u paraqit në shtëpinë time sikur asgjë nuk kishte ndodhur. Mmmm, e çuditshme. A nuk mendoni edhe ju? – vazhdon Icardi, duke e akuzuar se ka shkelur çdo vendim të gjykatësit dhe të një kujdestari të fëmijëve. – Por, meqë nuk i leverdis, tani kërkon të ndryshojë juridiksionin, pasi ka ndërruar tre avokatë? Çfarë strategjie brilante, ose çfarë këshille të keqe ligjore, do të thosha unë. Gjithsesi, të shohim kush do të na bëjë favorin”.
Ish-kapiteni i Interit e mbyll me një provokim tjetër: “Po ju lë një provë të vogël nga shumë që kam. Ahhh, harrova… Ajo gjithashtu kërkoi numrin tim të telefonit nga frika… Frikë se e vërteta do të dalë në dritë? Apo nga çfarë tjetër kemi frikë? Tik, tak, tik, tak…”
