Një atentat i rëndë ka ndodhur në zonën e Xhamllikut në Tiranë, ku humbi jetën 28-vjeçari Klaudio Prendi, djali i ish-gjyqtarit Fran Prendi.
Ngjarja ka ndodhur pas mesnate, kur Klaudio u qëllua me pesë plumba teksa ndodhej në makinën e tij luksoze tip “Porsche”. Autorët e vrasjes dyshohet se kanë përdorur një armë me silenciator, duke shmangur çdo zhurmë gjatë krimit.
Pas atentatit, një automjet me targa të huaja u gjet i djegur në zonën e Farkës, i cili dyshohet se u përket autorëve.
Kush është Fran Prendi?
Fran Prendi është një figurë e njohur në sistemin e drejtësisë shqiptare. Ai ka ushtruar detyrën e gjyqtarit në ish-Gjykatën për Krimet e Rënda që prej vitit 2006 dhe më pas në Gjykatën e Posaçme për 1 vit. Në nëntor të vitit 2020, ai u largua nga sistemi i drejtësisë duke dhenë dorëheqjen, pa kaluar në procesin e vettingut.
Ndër vendimet më të rëndësishme që mbajnë firmën e tij është dënimi i kriminelit famkeq Emiljano Shullazi dhe grupit të tij në vitin 2018, si dhe çështja ndaj Salvatore Lettizias, një anëtar i mafias italiane Camorra, për masakrën e ndodhur në bulevardin “Zogu I” në vitin 2015. Përveç karrierës gjyqësore, Prendi është njohur edhe për lidhjet e tij me politikën, duke u shfaqur si një mbështetës i kandidatëve të koalicionit Berisha-Meta, veçanërisht ndaj Rrok Dodajt.
Sipas burimeve për mediat djali i tij, Klaudio Prendi ishte përfshirë në një ngjarje me të shtëna armësh në Pukë në maj të vitit 2023. Aktualisht, hetimet po shqyrtojnë dy pista kryesore: e para, lidhur me ndonjë hakmarrje që ka të bëjë personalisht me të, dhe e dyta për ndonjë akt të motivuar nga detyra e babait të tij si ish-gjyqtar.
