Policia e Lezhës ka reaguar lidhur me ngjarjen e ndodhur mbrëmjen e sotme në Lezhë, ku një 24-vjeçar i identifikuar si Romario Brunga, u gjet i vrarë me armë zjarri brenda makinës së tij.
Ngjarja ka ndodhur në fshatin Balldren.
Policia thotë se nga veprimet e para të kryera në vendngjarje nga grupi hetimor, është gjetur brenda në automjet një armë zjarri tip pistoletë, dhe një gëzhojë.
Po nga veprimet e para, rezulton se automjeti nuk ka dëmtime të jashtme nga armë zjarri, ndërsa viktima ka vetëm një plagë të shkaktuar nga armë zjarri.
Grupi hetimor, nën drejtimin e Prokurorisë, vijon veprimet intensive në vendngjarje për zbardhjen e plotë të rrethanave dhe dokumentimin ligjor të ngjarjes, për të përcaktuar nëse kemi të bëjmë me vetëvrasje apo me vrasje.
Policia bën me dije se në lidhje me këtë ngjarje do të ketë informacion më të plotë pas përfundimit të veprimeve të para hetimore.
