Vala e të nxehtit në qershor besohet se ka shkaktuar më shumë se 4,000 viktima në vende të Evropës Perëndimore, sipas shifrave paraprake kombëtare.
Franca regjistroi 2,025 viktima, një rritje prej gati 30%, në kulmin e valës rekord të të nxehtit në vend.
Belgjika pa një rritje prej 39% të vdekshmërisë, duke arritur në 1,222 vdekje të tepërta. Autoritetet belge thanë se kjo përfaqëson numrin më të lartë ditor të vdekjeve në vend që nga vala e parë e koronavirusit.
Holanda regjistroi rreth 480 vdekje në javën e 22-28 qershorit, me numrin më të madh mes njerëzve moshës 80 vjeç e lart.
Në Spanjë u raportuan të paktën 1,028 vdekje të lidhura me nxehtësinë, më shumë se dyfishi i regjistruar në qershor të vitit të kaluar.
Shifrat mbeten paraprake dhe agjencitë e shëndetit publik kanë paralajmëruar se numri mund të jetë më i lartë.
Ndërsa temperaturat e larta pritet të kthehen, qeveritë tani janë nën presion për t’u përgjigjur.
Në Francë, politikanët e opozitës kritikuan reagimin e qeverisë ndaj nxehtësisë ekstreme dhe të Gjelbrit ngritën një mocion mosbesimi kundër qeverisë, duke argumentuar se ajo kishte dështuar ta përgatiste vendin për rritjen e temperaturave.
