Policia e Shtetit ka finalizuar fazën e 80-të të operacionit policor të koduar “Operacionalja”, duke lokalizuar dhe arrestuar në Tiranë një shtetas të shpallur në kërkim ndërkombëtar për vrasje të trefishtë në Maqedoninë e Veriut.
Si rezultat i disa muajve hetime dhe kërkime intensive nga Drejtoria e Forcës së Posaçme Operacionale, në Departamentin e Policisë Kriminale, shërbimet operacionale lokalizuan në zonën e Liqenit të Thatë dhe kapën shtetasin Besim Sherifi, 52 vjeç, banues në Kopanica, Saraj, Maqedoni e Veriut.
Nga verifikimet e thelluara rezultoi se 52-vjeçari fshihej prej kohësh në Tiranë, duke përdorur dokumente identifikimi dhe leje drejtimi të falsifikuara, në emër të një shtetasi nga Kosova.
Arrestimi i tij u krye me qëllim ekstradimi, pasi ai ishte shpallur në kërkim ndërkombëtar nga Interpol Shkupi, në bazë të një vendimi të Gjykatës së Shkupit të vitit 2007, e cila i ka caktuar masën e sigurisë “Arrest në burg” për veprën penale “Vrasja”, vepër për të cilën legjislacioni penal i Maqedonisë së Veriut parashikon dënim maksimal burgim të përjetshëm.
Sipas autoriteteve, Besim Sherifi dyshohet se më 5 tetor 2007, në fshatin Kopanica, Shkup, ka vrarë me armë zjarri 3 shtetas.
Gjatë kontrollit fizik dhe në banesën ku qëndronte, policia i sekuestroi 1 pasaportë kosovare, 1 kartë identiteti kosovare dhe 1 leje drejtimi automjeti, të gjitha të dyshuara si të falsifikuara.
Materialet procedurale për veprën penale “Falsifikimi i dokumenteve” i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ndërsa Interpol Tirana, në bashkëpunim me Interpol Shkupin, po vijon procedurat për ekstradimin e këtij shtetasi drejt Maqedonisë së Veriut.
