Kandidatja e Partisë Socialiste në zgjedhjet parlamentare të 11 Majit në Qarkun e Fierit, Maldrita Bardho, është emëruar ditën e sotme në postin e nënkryetares në Bashkinë e Lushnjës.
Lajmin e ka bërë me dije Belinda Balluku, përmes një postimi në rrjetet sociale, ku njofton se e ka prezantuar Bardhon ditën e sotme përpara Këshillit Bashkia.
Ky është një cënim i drejtpërdrejtë i pushtetit vendor, ku një zëvendëskryeministre, apo drejtuese politike, ndërhyn në pushtetin vendor duke emëruar një nënkryetare, edhe pse firma ka qenë e kryebashkiakes Eriselda Sefa.
Ndërkohë, ky duket se është një shpërblim për Maldrita Bardhon, pasi në të ashtuquajturin “Pazari i Roskovecit”, me urdhër nga lart ajo i fali mandatin e deputetes, Zegjine Çaushit.
Në zgjedhjet e 11 Majit, Zegjine Çaushi arriti të merrte mandatin e 12-të të socialistëve në Fier me 4 674 vota preferenciale në total, teksa pas saj, ajo që e humbi mandatin ishte Maldrita Bardho me 4 610 vota. Pra, diferenca mes tyre ishte vetëm 64 vota.
Pas rinumërimit, Zegjine Çaushit i janë hequr 48 vota, ndërsa kandidates Maldrita Bardhos i janë shtuar 26 vota. Kjo ka sjellë që kjo e fundit të shkojë 10 vota më shumë se sa Zegjine Çaushit duke i marrë kështu edhe mandatin e deputetit.
Gjithsesi, Bardho vendosi të hiqte dorë nga mandati, duke i lënë vendin në Kuvend, Zegjine Çaushit, “mikeshës së saj”, siç e konsideronte ajo.
Zegjine Çaushi, një zyrtare në Bashkinë e Roskovecit, ishte një emër pothuajse i panjohur për publikun, deri në momentin kur Gazment Bardhi denoncoi se ajo, përmes të ëmës Vjollca Caushi, kishte përfituar grante për ndërtimin e një bujtine.
Zegjine Çaushi iu përgjigj Bardhit me një video ironike, të cilat i kishte të shpeshta gjatë gjithë fushatës, sa herë që Bardhi sulmon Ballukun. Kjo e fundit e përdori Zegjine Çaushin për të ironizuar kundërshtarin e saj kryesor në Fier, teksa në këtë mënyrë Zegjineja përfitonte promovim nga mediat pranë Qeverisë
