Një incident i dhunshëm tronditi pushuesit sot në plazhin e Ksamilit, ku një person me precedentë penalë sulmoi me grusht pronarin e Euro Hotel, Albert Pashajn, përpara familjarëve dhe fëmijëve. Agresori u identifikua si Agim Taraj, i njohur për precedentë në dhunë dhe trafik droge.
Ngjarja tronditi komunitetin dhe nxori në pah mungesën e sigurisë në vijën bregdetare, duke ngritur dyshime për punën e policisë së Sarandës. Pas përhapjes së lajmit dhe shkaktimit të frikës mes pushuesve, shefi i komisariatit të Sarandës, Gëzim Bashllari, ndërmori masa duke shoqëruar agresorin në polici.
Në një njoftim të vonë, policia bëri me dije se agresori është në pranga dhe po vijon puna për identifikimin dhe arrestimin e personave të tjerë të dyshuar për përfshirje në konflikt.
“Në orën 12:45, në Ksamil, gjatë një konflikti për motive të dobëta, shtetasi A.P. është dhunuar me sende të forta. Shërbimet e Komisariatit të Policisë Sarandë kanë shoqëruar shtetasin A.T. dhe po vijojnë identifikimin e personave të tjerë të përfshirë në ngjarje,” njofton policia.
Në një reagim të mëparshëm, Albert Pashaj tha se kjo është hera e dytë që dhunohej fizikisht, dhe pavarësisht se e kishte referuar rastin te organet kopetente, asnjë masë nuk ishte marrë.
