Një i ri shqiptar ka arritur që “t’ia mbathë” nga duart e autoriteteve zviceriane në Baden. Sipas asaj që mediat vendase raportojnë mësohet se i burgosuri 23-vjeçar është arratisur mëngjesin e së enjtes, teksa ishte duke u transportuar për në qelinë ku dhe do vuante dënimin.
I riu shqiptar kishte veshur pantallona të zeza, një xhaketë të zezë me mëngë të bardha dhe atletë po në ngjyrë të bardhë.
Ndonëse, policia, së bashku me qentë kanë “zbarkuar” në perimetrin ku dhe dyshohet se shqiptari mund të jetë fshehur, deri më tani ata nuk kanë bërë të mundur lokalizimin dhe arrestimin sërish të tij.
Nëpër mediat, por dhe nëpër rrjetet zyrtare të Policisë, efektivët po u bëjnë apel qytetarëve që në rast se e shohin 23-vjeçarin menjëherë të lajmërojnë autoritetet në numrin “117”.
Sipas Policisë Kantonale të Aargaut, i riu shqiptar nuk përbën kërcënim për publikun, ndërkohë që deri më tani nuk ka më tepër informacione.
“Për arsye privatësie, nuk mund të komentojmë mbi faktet specifike të çështjes. I arratisuri është dënuar tashmë në shkallën e parë, por vendimi nuk është bërë ende i formës së prerë. Ai iku kur ishte gati të transferohej në një burg tjetër të rrethit”, tha zëdhënësi i Departamentit të Çështjeve Ekonomike dhe Punëve të Brendshme, Annette Kielholz.
