Një hap i madh për Enzo Alves. Djali 16-vjeçar i legjendës së Real Madridit, Marcelo, ka nënshkruar kontratën e tij të parë profesionale me klubin madrilen.
Lajmi është bërë publik sot, ndërsa detajet financiare të marrëveshjes nuk janë zbuluar. Megjithatë, duke qenë se Enzo është produkt i akademisë së Real Madridit, pritet që kontrata të jetë afatgjatë, si investim i klubit te talenti i ri.
Pavarësisht moshës, Enzo Alves aktivizohet aktualisht me Real Madrid U-18 dhe këtë sezon ka regjistruar 3 paraqitje.
Për Marcelo-n, ky është një moment krenarie. Braziliani luajti me Real Madridin nga 2007 deri në 2022, duke zhvilluar 546 ndeshje, shënuar 38 gola dhe dhënë 104 asiste, duke u kthyer në një nga emrat më të rëndësishëm në historinë e “Los Blancos”.
