Tarifat e reja doganore prej 50% të vendosura nga Presidenti amerikan Donald Trump ndaj Indisë kanë hyrë zyrtarisht në fuqi, duke shkaktuar valë reagimesh në tregjet ndërkombëtare dhe një mobilizim të shpejtë nga qeveria indiane.
Vendimi i Trump vjen pak javë pasi nënshkroi një urdhër ekzekutiv që godet Indinë me një tjetër tarifë shtesë 25%, si ndëshkim për blerjet e vazhdueshme të naftës dhe armëve ruse. Kjo e bën Indinë një nga vendet më të penalizuara nga tarifat amerikane në mbarë botën.
Ekspertët paralajmërojnë se tarifat do të prekin rëndë eksportet indiane – që përfshijnë tekstile, diamante, ushqime detare dhe produkte të tjera që mbushin tregun amerikan – duke vënë në rrezik miliona vende pune në një nga ekonomitë më të mëdha në zhvillim.
Në reagim të menjëhershëm, Kryeministri indian Narendra Modi ka premtuar masa të forta ekonomike për të zbutur ndikimin e tarifave, përfshirë ulje të ndjeshme të taksave dhe reforma të thella në sistemin e TVSH-së.
Gjatë fjalimit të Ditës së Pavarësisë në Fortesën e Kuqe në Delhi, Modi u bëri thirrje qytetarëve dhe bizneseve të vogla që të mbështesin prodhimin vendas, duke i nxitur të vendosin pankarta “Made in India” në dyqanet e tyre.
“Duhet të bëhemi të vetë-mjaftueshëm – jo nga frika, por nga krenaria,” tha ai.
Qeveria indiane ka njoftuar planet për të thjeshtuar dhe ulur normat e TVSH-së (GST), duke synuar rritjen e konsumit të brendshëm. Këto ndryshime, së bashku me një ulje të mëparshme të taksave mbi të ardhurat që hyn në fuqi në prill 2025, pritet të injektojnë miliarda dollarë në ekonomi.
Sipas analistëve ndërkombëtarë, përfshirë bankën amerikane Morgan Stanley dhe grupin UBS, këto masa mund të ndihmojnë në ruajtjen e rritjes ekonomike të Indisë, që kohët e fundit është ngadalësuar pas pandemisë dhe rënies së kërkesës globale.
Banka Qendrore e Indisë ka ulur normat e interesit me 1% muajt e fundit dhe pritet të ndërmarrë masa të tjera për të nxitur huadhënien. Ndërkohë, një rritje pagash për afro 500 mijë punonjës publikë pritet të hyjë në fuqi në fillim të vitit të ardhshëm.
Pavarësisht pasigurisë tregtare, tregjet financiare indiane kanë reaguar pozitivisht ndaj nismave të qeverisë dhe vendi mori këtë muaj një përmirësim të rrallë të vlerësimit kreditor nga agjencia S&P Global – për herë të parë pas 18 vitesh.
Megjithatë, tensionet tregtare me SHBA po thellohen. Bisedimet dypalëshe për një marrëveshje të re tregtare janë pezulluar, ndërsa ekspertët paralajmërojnë se tarifa 50% është praktikisht një sanksion i drejtpërdrejtë ndaj tregtisë mes dy prej ekonomive më të mëdha të botës.
