Një djalë 19-vjeçar nga Kamza ka humbur jetën në Santorini pas shembjes së papritur të çatisë që ai po riparonte. Emri i të riut ishte Aurel Elezi. Ai u rrit në jetimore. Pas braktisjes nga nëna në një moshë fare të vogël dhe mungesës së kujdesit nga i ati, Aureli pati një jetë me sakrifica e cila përfundoi tragjikisht në lule të rinisë.
Aurel kishte udhëtuar në Greqi për të punuar. Dje, ai ishte duke kryer punime në një pronë në Imerovigli, ku ndërtimi kishte strukturën e një shpelle. Gjatë kohës që po riparonte çatinë e këtij objekti, ndodhi ngjarja tragjike, pasi papritmas u zën poshtë nga struktura e dëmtuar.
Autoritetet greke kanë arrestuar pronarin e objektit dhe përgjegjësin për ndërtimet e zhvilluara më parë. Mediat greke njoftuan se ky rast nuk ka lidhje me zhvillimet sizmike të fundit që kanë ndodhur në zonë, dhe ende nuk janë zbardhur plotësisht shkaqet e kësaj ngjarje fatale.
Sabail Gjyli, miku i jetimores ku u rrit 19-vjeçari ka treguar historinë e tij të trishtë për Dritare Tv.
“Aurel Elezi që në moshë 9 vjeçe u braktis nga mamaja e cila u martua në Bosnjë me një burrë tjetër. Babai i tij ishte pijetar dhe nuk punonte. Disa komshij e ndihmuan për ta çuar djalin te një shoqatë turke për bamirësi. Ata e shkolluan dhe e rritën deri në klasën e 9-të në moshën 15-vjeçare. Unë aty e njoha Aurelin. Gjithmonë ku bisedonim më thoshte: “Dua të takoj mamin.” Kishte shumë deshirë të takohej me të edhe pse nuk kishte asnjë kontak, por ëndrra dhe deshira e tij ishte madhe.
Pasi mbaroi shkollën 9-vjeçare në Kamëz, ai iku në një fshat të Kukësit te njerëzit e mamasë për të gjetur kontakt për mamanë. Nuk e di nëse e takoi të ëmën, por ata njerëz që e mbajtën ishin gjyshja dhe gjyshi. Njëri prej atyre humbi jetën. Kur Aureli arriti moshën madhore 18 vjeç, ëndrra e tij ishte që të kishte një shtëpi ku të ndërtonte familjen e tij të munguar. Ai ndenji 2 vjet në Santorini të Greqisë dhe aty humbi edhe jetën. Jeta e një njeriu të vuajtur, plot halle, merr fund në mënyrë kaq tragjike, në vendin ku iku për të përmirësuar jetën.
Tani është një biznesmen që po i mbulon shpenzimet e varrimit dhe po presin trupin e pajetë të vijë nga Greqia dhe do varroset në Valias, në Kamëz.”, thotë zoti Gjyli.
