Një operacion i koordinuar nga Interpoli ka rezultuar në arrestimin e 260 personave të dyshuar për lidhje me skemat e mashtrimit online, përfshirë ato të dashurisë dhe shantazhit seksual.
Ky aksion u zhvillua gjatë muajve korrik dhe gusht në 14 vende të Afrikës dhe synoi ato raste ku autorët krijojnë marrëdhënie romantike për të nxjerrë para nga viktimat ose për t’i shantazhuar ato me imazhe të papranueshme.
Sipas Interpolit, këto skema kanë prekur mbi 1,400 viktima dhe kanë shkaktuar një humbje totale prej afërsisht 2.8 milion dollarësh ose 2.4 milion euro.
Cyril Gout, drejtori ekzekutiv i shërbimeve policore në Interpol, theksoi se njësitë e luftës ndaj krimit kibernetik në Afrikë po raportojnë një rritje të dukshme të krimeve që kanë si bazë internetin, si sextortioni dhe mashtrimet romantike.
Rritja e platformave online ka krijuar mundësi të reja për rrjetet kriminale për të shfrytëzuar viktimat, duke shkaktuar jo vetëm humbje financiare, por edhe dëmtime psikologjike.
Në Gana, autoritetet arrestuan 68 të dyshuar në skemat e dashurisë dhe shantazhit seksual, duke i akuzuar ata se përdorin identitete false për të mashtruar viktimat që të paguajnë tarifa të rreme dërgimi dhe për të regjistruar sekretisht video të papërshtatshme për shantazh.
Ndërsa në Senegal, policia arrestoi 22 të dyshuar që pretendojnë se janë celebritete në platformat sociale dhe i mashtruan mbi 100 persona për rreth 34,000 dollarë (29,135 euro).
Edhe autoritetet në Côte d’Ivoire arrestuan 24 të dyshuar, të akuzuar për krijimin e profileve false dhe shantazhin e viktimave me imazhe intime.
Interpoli, me 196 vende anëtare, është rrjeti më i madh policor ndërkombëtar për të luftuar krimin ndërkombëtar. Qendra e saj në Lion punon për të ndihmuar forcat policore kombëtare të komunikojnë midis tyre dhe të ndjekin të dyshuarit në fusha si kundërterrorizmi, krimi financiar dhe krimi kibernetik.
Në vitet e fundit, organizata ka hasur sfida të reja, përfshirë rritjen e rasteve të krimit kibernetik dhe abuzimit seksual ndaj fëmijëve.
