Sot, në Teatrin Kombëtar të Operës dhe Baletit po mbahen homazhe në nder të aktores Margarita Xhepa, e cila ndërroi jetë në moshën 91-vjeçare.
Aktorja Tinka Kurti foli shkurtimisht për media duke u shprehur se Xhepa ishte shoqe e mikeshë, e se ndjen dhimbje të madhe.
“E kisha vajzë, shoqe, e kisha mikeshë. Nuk kemi se çfarë bëjmë, unë jam më e madhe se ajo. Duhet të hesht, ka dhimbje të madhe shumë”, tha ajo.
Pas përfundimit të ceremonisë zyrtare, arkmorti që mbante trupin e aktorës së madhe është përcjellë mes duartrokitjeve të të pranishmëve për në banesën e fundit.
Ishin të shumtë ata që erdhën t’i jepnin lamtumirën e fundit zonjës së skenës shqiptare, miq, kolegë, artistë, e qytetarë që e deshën dhe e duartrokitën për dekada me radhë.
Margarita Xhepa u përcoll për në banesën e fundit me nderime dhe dashurinë e një kombi të tërë që e rriti me rolet e saj, me shpirtin dhe elegancën që vetëm ajo dinte të sillte në skenë e ekran. Lamtumirë, zonjë fisnike. Artin tënd do ta kujtojmë gjithmonë!
