Në mjediset e Akademisë së Shkencave po mbahen homazhet në nderim të Artan Lames, i cili u nda nga jeta në moshën 58-vjeçare, pas një ndërhyrjeje në zemër të kryer në Gjermani.
Të afërm, miq, kolegë dhe figura të njohura të jetës publike i japin lamtumirën e fundit një personaliteti që për dekada me radhë kontribuoi në institucionet shtetërore, shoqërinë civile dhe në ruajtjen e trashëgimisë kulturore të vendit. Homazhet pritet të vijojnë deri në mesditë, për t’u pasuar nga ceremonia e varrimit.
Ministri i Drejtësisë, Ulsi Manja, e cilësoi ndarjen e Lames si një humbje të madhe për vendin:
“Artan Lame ishte miku im në debate konstruktive e miqësore. Ishte një njeri i ditur, që nuk kursehej për të mbrojtur kauza të mëdha publike e kombëtare. Shoqëria civile ka humbur një aktivist të shkëlqyer, një patriot të vërtetë.”
Ndërsa ministri i Ekonomisë, Kulturës dhe Inovacionit, Blendi Gonxhe, e përshkroi Lamen si një figurë të pazëvendësueshme në ruajtjen e trashëgimisë sonë:
“Sot kemi humbur një kujdestar të rrallë të historisë dhe kulturës shqiptare. Do të bëjmë gjithçka për të realizuar amanetin e tij për krijimin e muzeut të koleksioneve dhe historisë shqiptare, të cilin ai e kishte pasion të veçantë.”
Gjatë karrierës së tij, Artan Lame mbajti funksione të rëndësishme publike, përfshirë postet si zëvendësministër i Turizmit, nënkryetar i Bashkisë së Tiranës, Drejtor i Përgjithshëm i ALUIZNI-t dhe më pas i Agjencisë Shtetërore të Kadastrës.
Përveç angazhimeve institucionale, ai dha një kontribut të vyer si veprimtar i shoqërisë civile, publicist, opinionist dhe studiues i historisë shqiptare, me një përkushtim të veçantë për ruajtjen e trashëgimisë kulturore.
