Autoritetet holandeze kanë konfirmuar rastin e parë të eutanazisë së një fëmije nën moshën 12-vjeçare, që prej zgjerimit të rregullave në vitin 2024 për të lejuar procedurën në raste të jashtëzakonshme. Lajmi u bë i ditur nga ministrja e Shëndetësisë, Sophie Hermans, e cila informoi parlamentin se fëmija, i prekur nga një sëmundje e rëndë dhe e pashërueshme, kishte ndërruar jetë në fund të vitit 2025. Autoritetet nuk kanë bërë publike detaje për identitetin, moshën apo gjendjen mjekësore të fëmijës.
Në Holandë, eutanazia është e ligjshme për të rriturit që nga viti 2002, ndërsa deri së fundmi përfshinte edhe të miturit mbi 12 vjeç në kushte të rrepta. Rregullorja e re, që hyri në fuqi në shkurt 2024, lejon ndërprerjen e jetës për fëmijët nga 1 deri në 12 vjeç vetëm kur ata vuajnë në mënyrë të padurueshme, nuk kanë asnjë shpresë për përmirësim dhe nuk ekziston alternativë tjetër mjekësore për lehtësimin e dhimbjeve. Çdo rast i tillë i nënshtrohet një shqyrtimi të detajuar nga autoritetet dhe prokuroria për të verifikuar nëse janë respektuar të gjitha kushtet ligjore dhe etike.
