Drejtori i Përgjithshëm të Policisë së Shtetit, Skënder Hita ka marrë pjesë këtë të mërkurë në Samitin e Diasporës, në panelin për “Migracionin dhe politikat e riatdhesimit”. Gjatë fjalës së tij, Hita u shpreh se policia e Shtetit ka hyrë në një fazë të re modernizimi dhe transformimi. Ai theksoi se qëllimi është që policis të jetënë shërbim të ligjit, qytetarëve dhe të huaji që viziton Shqipërinë.
“Shqipëria sot po përjeton flukse të larta turistike dhe kjo kërkon menaxhim profesional, reagim të shpejtë dhe koordinim të plotë institucional.
Në këtë kuadër, Policia e Shtetit ka rritur kapacitetet për menaxhimin e flukseve, qoftë në kufij, në akse rrugore apo në qendrat turistike, si dhe për përballimin me efikasitet të çdo ngjarjeje që mund të cenojë sigurinë publike.
Ndërkohë, Policia e Shtetit, veçanërisht strukturat e Policisë Kufitare, janë angazhuar maksimalisht për parandalimin dhe menaxhimin e flukseve migratore, kryesisht nga shteti grek në drejtim të vendit tonë, me destinacion vendet e Bashkimit Evropian”, tha ai.
Hita shtoi se janë goditur rrjetet e kontrabandimit të emigrantëve të paligjshëm, organizatorët dhe transportuesit që janë pjesë e këtyre rrjeteve. Sipas tij, siguria është pasaporta e Policisë së Shtetit për miliona turistë dhe vizitorë.
“Kemi bashkëpunuar ngushtësisht me partnerët për të parandaluar trafiqet e paligjshme, përfshirë këtu edhe kalimet e paligjshme të kufirit dhe dhënien e ndihmës kundrejt përfitimit për kalim të paligjshëm të kufirit.
Në këtë kuadër, dua të përmend një nga rastet e suksesshme të bashkëpunimit, atë me Mbretërinë e Bashkuar, ku kemi ulur në mënyrë drastike numrin e personave që tentonin të hynin në mënyrë të paligjshme në Mbretërinë e Bashkuar, si dhe të atyre që tentonin të përdornin Shqipërinë si vend transit”, tha ai ndër të tjera.
