Enea Mekolli, vetëm 34-vjeç, babai i një vogëlushi të vogël, ra sot dëshmor i atdheut në orët e para të mëngjesit të kësaj të enjteje, gjatë një operacioni policor për arrestimin e të shumëkërkuarit Violand Braçellari. Në përpjekje për të vënë në pranga një të arratisur nga drejtësia, plumbat i morën jetën policit 34-vjeçar, duke i prerë në mes ëndrrat dhe jetën që kishte përpara.
Zija ka pllakosur sërish mbi familjen Mekolli, një familje që duket se fati e ka goditur dy herë në mënyrën më të pamëshirshme. Dy djem, të dy të veshur me uniformat e Policisë së Shtetit, dhe sot asnjëri prej tyre nuk është më.
Disa vite më parë, vëllai i madh i Eneas humbi betejën me një sëmundje të rëndë, leuçeminë. Edhe ai ishte efektiv policie, njësoj si i vëllai që sot ra në krye të detyrës, duke lënë pas një boshllëk që nuk mbushet më.
Sipas gazetarit Xhensil Shkëmbi, kjo familje e thyer nga dhimbja po përjeton një tragjedi të dyfishtë, një nënë që tashmë ka përcjellë një djalë në banesën e fundit dhe ditën e nesërme për fatin e keq do të përcjellë dhe djalin tjetër.
“Një baba që sheh djalin e tij të vdekur. Familja Mekolli është duke përjetuar dyfish dhimbjen. Familja Mekolli ka një histori tragjike sepse ka pasur dy djem, të dy policë dhe sot të dy nuk i ka më. Djali i madh humbi jetën për shkak të një sëmundje si leucemia përpara disa vitesh, po ashtu dhe ai ishte polic si vëllai i tij.
Ndërkohë që ditën e sotme Enea Mekolli ra dëshmor i atdheut. Shkoi për të arrestuar një të shumëkërkuar dhe një nënë do të fusë në dhe djalin tjetër të saj, njërin e ka vendosur dhe një tjetër do e vendosë ditën e nesërme. Të dy policë.”, tha gazetari.
