Brazili është eliminuar nga Kupa e Botës. Eksperienca e parë e Carlo Ancelottit në krye të Seleçaos përfundoi në mënyrën më të hidhur, pas një disfate të rëndë ndaj Norvegjisë së Erling Haaland.
Sulmuesi norvegjez vendosi ndeshjen me dy gola në minutat e fundit, duke e dërguar skuadrën nordike në çerekfinale. Me shtatë gola në turneun e tij të parë botëror, Haaland është tashmë një nga kandidatët kryesorë për Këpucën e Artë.
Ancelotti kishte një mungesë të rëndësishme në mesfushë, pasi Lucas Paquetá ishte i dëmtuar dhe jashtë për pjesën e mbetur të turneut. Në vend të tij u aktivizua Martinelli, në një formacion shumë ofensiv, me Brazilin që kërkonte të mbante nën kontroll Sorloth, Odegaard dhe mbi të gjitha Haaland.
Norvegjia e nisi fuqishëm ndeshjen dhe trembi menjëherë Brazilin me një gol të Berg, i cili u anulua. Seleçao reagoi shpejt dhe pati mundësi të kalonte në avantazh, por Bruno Guimarães gaboi nga pika e penalltisë.
Pas atij momenti, Brazili mori ritmin. Casemiro kontrolloi mesfushën me përvojën e tij, Guimarães shtyu përpara, Martinelli lëvizi mes linjave, ndërsa Vinicius ishte rreziku kryesor nga krahu i majtë. Sulmuesi i Real Madridit ishte lojtari më aktiv i brazilianëve, por nuk arriti të finalizonte rastet e krijuara.
Në pjesën e dytë, loja u bë më e hapur. Endrick pati një mundësi të artë sapo hyri në fushë, pas një pasimi të Vinicius, por nuk arriti të mposhtte portierin Nyland. Nga ana tjetër, Norvegjia u përgjigj me kundërsulme të shpejta dhe me Haaland gjithmonë gati për të ndëshkuar.
Ancelotti provoi edhe kartën Neymar, por hyrja e tij nuk solli ndryshimin e pritur. Brazili humbi ekuilibrin në fushë dhe Norvegjia përfitoi. Në minutën e 79-të, pas një krosimi të Schjelderup, Haaland zhbllokoi sfidën. Brazili tentoi të reagojë, por në minutën e fundit sulmuesi norvegjez shënoi edhe golin e dytë, duke vulosur kualifikimin.
Neymar shkurtoi diferencën nga penalltia në shtesë, por ishte shumë vonë. Brazili largohet nga Botërori, ndërsa Haaland vazhdon marshimin e tij të frikshëm.
Norvegjia dominoi kontrollin e topit me 66.5% posedim dhe realizoi 680 pasime, pothuajse dyfishin e Brazilit. Megjithatë, brazilianët krijuan më shumë rrezik, me 2.73 xG dhe 14 goditje, por nuk arritën të ishin efikasë përpara portës.
