Pasditen e sotme, një ngjarje e rëndë ka tronditur zonën e Përrenjasit, ku një minator ka humbur jetën si pasojë e një aksidenti në Minierën e Kromit në Katjel. Viktima është identifikuar si Syrja Bego, 58 vjeç.
Miniera ku ndodhi aksidenti menaxhohet nga Gëzim Balla, i cili në një prononcim telefonik për “BalkanWeb” u shpreh thellësisht i prekur dhe i tronditur nga humbja e jetës së minatorit. Ai tha se miniera nuk kishte qenë aktive për disa ditë, pasi po kryheshin përgatitje për rikthimin e procesit normal të punës.
Sipas Ballës, sot rreth mesditës gjithçka ishte gati për rifillimin e punës dhe ishin marrë të gjitha masat për sigurinë. Drejtuesi teknik, Hysni Kllogjri, kishte inspektuar kushtet në galeri dhe kishte mbajtur trajnimin e zakonshëm me punëtorët, duke theksuar rëndësinë e respektimit të standardeve të sigurisë.
Fatkeqësisht, pak më vonë, ndodhi tragjedia. Balla tha se ishte njoftuar nga përgjegjësi i turnit, Gëzim Kllogjri, për një aksident të rëndë. Sipas informacionit paraprak, një gur i madh ishte shkëputur nga tavani i galerisë dhe kishte goditur për vdekje minatorin Syrja Bego.
“Ngjarja na ka tronditur thellë. Jam i shokuar dhe thellësisht i prekur nga kjo humbje. Siguria e punonjësve ka qenë dhe mbetet prioriteti ynë kryesor,” u shpreh Balla.
