Pep Guardiola vazhdon të shkruajë histori në futboll. Me triumfin në FA Cup, trajneri spanjoll ka arritur në 41 trofe në karrierë, duke u renditur i dyti në listën e trajnerëve më të suksesshëm të të gjitha kohërave.
Para tij qëndron vetëm Sir Alex Ferguson, i cili ka fituar 49 tituj gjatë karrierës së tij si trajner. Guardiola tani është vetëm tetë trofe larg legjendës së Manchester United.
Ky ishte trofeu i dytë i sezonit për Manchester City, pas Carabao Cup të fituar në muajin mars. Me klubin anglez, Guardiola ka fituar tashmë 20 tituj, duke qenë trajneri më i suksesshëm në historinë e City.
Gjatë aventurës së tij në Manchester, Pep ka fituar 6 tituj të Premier League, 5 Carabao Cup, 4 FA Cup, 3 Community Shield, 1 Champions League, 1 UEFA Super Cup dhe 1 Kupë Bote për Klube.
Te Barcelona, Guardiola fitoi 14 trofe në vetëm katër sezone, duke ndërtuar një nga skuadrat më të kujtuara në historinë e futbollit. Me katalanasit ai fitoi 3 La Liga, 3 Superkupa të Spanjës, 2 Champions League, 2 Copa del Rey, 2 UEFA Super Cup dhe 2 Kupa Bote për Klube.
Edhe te Bayern Munich, spanjolli la gjurmë me 7 trofe në tre sezone: 3 Bundesliga, 2 Kupa të Gjermanisë, 1 UEFA Super Cup dhe 1 Kupë Bote për Klube.
Pavarësisht një sezoni jo më të lehtë për Manchester City, Guardiola mbetet sinonim i suksesit. Ai ka ende mundësinë të fitojë Premier League këtë sezon, që do të ishte trofeu i tij i 42-të në karrierë.
Renditja e trajnerëve me më shumë tituj:
Sir Alex Ferguson – 49
Pep Guardiola – 41
Mircea Lucescu – 36
Valeriy Lobanovski – 33
Carlo Ancelotti – 31
