Real Madridi e nisi vitin me spektakël në “Santiago Bernabéu”, duke e mposhtur Betisin me shifrat 5-1 në një ndeshje ku protagonisti absolut ishte Gonzalo García, sulmuesi i akademisë që firmosi hat-trick dhe e ktheu pasditen në një festë të pastër “Valdebebas”.
Me Mbappé jashtë, Xabi Alonso i hapi derën një “numri 9” të pastër – dhe Gonzalo e justifikoi besimin menjëherë. Ai zhbllokoi rezultatin në minutën e 20’ pas asistit të Rodrygo-s, përpara se të shpërthente sërish në pjesën e dytë: gol i dytë në 50’ pas pasimit të Valverde-s dhe një gol i tretë në fund, për të vulosur një hat-trick që e çoi stadiumin në ekstazë.
Përtej Gonzalos, mbrëmja u kompletua nga dy emra të tjerë me “vulë” akademie: Asensio shënoi në 56’ (asist Rodrygo), ndërsa Fran García e mbylli gjithçka me golin e pestë në shtesë (90’+3), pas një tjetër aksioni që u finalizua nga Valverde. Betisi arriti vetëm një moment reagimi me Cucho Hernández në 66’, por ishte shumë pak për të ndryshuar rrjedhën e një ndeshjeje që Reali e kishte në kontroll.
Në tribuna nuk mungoi tensioni me Vinicius, i cili u fishkëllye sërish në disa momente, ndërsa pati edhe një episod të diskutueshëm në fillim ku madrilenët kërkuan penallti. Por kjo pasdite kishte një histori tjetër: Bernabéu gjeti një hero të ri dhe e përqafoi siç di ta bëjë vetëm me lojtarët e shtëpisë.
