Një rrjet kriminal që kishte pastruar 460 milionë euro të mashtrimeve të investimit në kriptomonesha, u shkatërrua në Spanjë nga Europol, në bashkëpunim me agjencitë e zbatimit te ligjit nga vende të tjera.
Europol tha se policia spanjolle udhëhoqi operacionin kundër rrjetit kriminal dhe se agjencitë e zbatimit të ligjit nga Franca, Estonia dhe Shtetet e Bashkuara ishin gjithashtu të përfshira.
Nga operacioni ranë në pranga 5 persona, 3 në ishujt Kanarie dhe 2 në Madrid.
Europol filloi të mbështesë hetimin në vitin 2023 dhe që atëherë, ekspertët e krimit financiar kanë ndihmuar autoritetet spanjolle duke koordinuar, duke ofruar mbështetje operative dhe duke dhënë analiza strategjike.
Për të kryer aktivitetet e tyre mashtruese, drejtuesit e grupit kriminal dyshohet se përdorën një rrjet bashkëpunëtorësh të shpërndarë në të gjithë botën.
Hetuesit dyshojnë se autorët kishin krijuar një rrjet kompleks korporativ dhe bankar me seli në Hong Kong, duke përdorur sisteme pagesash dhe llogari përdoruesish në emra të individëve të ndryshëm dhe në platforma të ndryshme shkëmbimi për të marrë, ruajtur dhe transferuar fondet e paligjshme.
