Një organizatë kriminale shqiptare e përfshirë në trafikimin e kokainës drejt Europës është goditur nga Policia Kombëtare Spanjolle, në bashkëpunim me Agjencia Tatimore Spanjolle.
Gjatë operacionit, autoritetet sekuestruan 200 kilogramë kokainë të fshehur në një kontejner në portin e Vigo dhe arrestuan tetë persona, pesë prej të cilëve janë vendosur në paraburgim.
Hetimi kishte nisur në vitin 2024 dhe synonte zbulimin e rrjeteve kriminale që shfrytëzonin linjat detare të drejtpërdrejta mes Amerikës Latine dhe rajonit të Galicia për futjen e drogës në tregun europian. Sipas autoriteteve, droga transportohej përmes anijeve kontejnerë, duke përdorur metodën e njohur si “grepi i verbër”, ku lënda narkotike fshihet në kontejnerë pa dijeninë e kompanive të transportit.
Pas disa muajsh përgjimi dhe vëzhgimi, hetuesit identifikuan anëtarët kryesorë të rrjetit. Faza operative e operacionit nisi më 12 janar, kur pesë persona u arrestuan në Vigo. Dy prej tyre u kapën në një banesë me qira pranë qytetit, ndërsa tre të tjerë u arrestuan në një restorant në qendër të qytetit, vetëm një ditë para mbërritjes së anijes që transportonte drogën.
Operacioni vijoi edhe në ditët pasuese, duke çuar në arrestime të tjera në A Coruña, Lugo, Madrid dhe rajonin O Salnés, ku ndodheshin anëtarë të tjerë të organizatës.
Sipas burimeve hetimore, kreu i grupit ishte një bashkëpunëtor i afërt i një trafikanti të njohur droge, tashmë i ndjerë, i cilësuar si “lordi i drogës”. Ai kishte siguruar mbështetjen e një organizate lokale për t’u vendosur në rajon dhe ndaj tij kishte një urdhër arresti në fuqi për trafik të lëndëve narkotike.
Gjatë operacionit u sekuestruan gjithashtu 20 mijë euro para cash. Autoritetet bëjnë me dije se kjo ishte përpjekja e parë e këtij grupi për të futur kokainë në Europë përmes portit të Vigos.
