Gjykata Supreme e SHBA-së i hapi të premten rrugë administratës së presidentit Donald Trump që të përdorë përkohësisht një bazë federale të të dhënave për të verifikuar shtetësinë e personave të regjistruar për të votuar. Vendimi 6-3 pezullon për momentin një urdhër të një gjykatësi federal që kishte bllokuar përdorimin e sistemit.
Baza e të dhënave quhet SAVE – Systematic Alien Verification for Entitlements dhe administrohet nga Departamenti i Sigurisë Kombëtare. Administrata Trump e ka zgjeruar sistemin për të kontrolluar të dhënat e shtetësisë së votuesve, ndërsa shtetet mund ta përdorin atë vullnetarisht. Gjykata Supreme tha se ligji federal i jep qeverisë detyrimin për t’iu përgjigjur kërkesave të autoriteteve shtetërore për verifikimin e shtetësisë.
Çështja ka shkaktuar një përplasje ligjore mbi privatësinë dhe rrezikun që votuesit amerikanë të identifikohen gabimisht si persona që nuk kanë të drejtë vote. Gjykatësi federal që e bllokoi sistemin kishte argumentuar se të dhënat mund të ishin të pasakta dhe se përdorimi i tyre mund të çonte në heqjen e gabuar të qytetarëve nga listat zgjedhore. Tre gjyqtare, Sonia Sotomayor, Elena Kagan dhe Ketanji Brown Jackson, kundërshtuan vendimin e shumicës.
