Një gjyqtar i Nju Jorkut ka rrëzuar dy akuza për terrorizëm ndaj 27-vjeçarit Luigi Mangione, i akuzuar për vrasjen e ish-CEO-s së UnitedHealthcare, Brian Thompson. Gjyqtari Gregory Carro theksoi se akuzat për terrorizëm ishin “ligjërisht të pamjaftueshme”, pasi ligji i Nju Jorkut e definon terrorizmin si një akt që synon të frikësojë ose të detyrojë një komunitet ose njësi qeveritare, dhe jo vrasjen e një individi. Mangione përballet ende me akuzën për vrasje të shkallës së dytë, e cila mund t’i sjellë burgim të përjetshëm.
Ngjarja ka ndodhur vitin e kaluar në Midtown Manhattan, teksa Thompson ishte duke shkuar për në një konferencë investitorësh. Pas sulmit, policia zbuloi gëzhoja dhe plumba me fjalë si “delay”, “deny” dhe “depose”. Pas një ndjekjeje disa-ditore, Mangione u arrestua në Pensilvani, ku u gjet arma dhe shënime përpara sulmit në çantën e tij. Ai është akuzuar gjithashtu në gjykatën federale, ku Departamenti i Drejtësisë planifikon të kërkojë dënimin me vdekje.
Avokatët e Mangione e kanë kundërshtuar ndjekjen në dy procese, duke theksuar se kjo është e paprecedentë dhe dëmton të drejtat e tij. Megjithatë, gjyqtari Carro theksoi se precedentet e Gjykatës së Lartë Amerikane lejojnë ndjekjen nga dy sovranitete të ndryshme. Në seancën e fundit, Mangione u paraqit në gjykatë i lidhur me pranga dhe i veshur me uniformë burgjosh. Dhjetëra mbështetës të tij ishin mbledhur para gjykatës, shumë prej tyre të veshur me ngjyrë jeshile, simboli i fushatës për të.
Gjatë kohës së tij në paraburgim, Mangione ka mbledhur mbi 1.2 milionë dollarë nëpërmjet donacioneve online, me shumat që fillojnë nga 5 dollarë. Seanca e radhës është caktuar për 1 dhjetor, ku do të shqyrtohet kërkesa e mbrojtjes për përjashtimin e disa provave të mbledhura nga policia. Në rast se shpallet fajtor në gjykatën shtetërore, ai riskon burgim të përjetshëm, ndërsa në atë federale mund të përballet me dënimin me vdekje.
