Në një fshat të vogël të Gjermanisë, ku ushtarët ushtrohen me raketa dhe shpërthime të fuqishme, vendasit tashmë janw mësuar të jetojnë me zhurmat e rënda të ushtrisë. Por, në të ardhmen, këto shpërthime mund të bëhen edhe më të mëdha.
Gjermania ka miratuar një rritje të madhe të investimeve për ushtrinë, pas miratimit nga parlamenti i një ligji që përjashton shpenzimet e mbrojtjes nga rregullat strikte të borxhit. Kjo ka ndodhur për shkak të kërcënimeve të mundshme nga Rusia, të cilat, sipas gjeneralit gjerman Carsten Breuer, mund të përfshijnë një sulm ndaj aleatëve të NATO-s në vetëm katër vite.
Gjermania, për shumë dekada, ka shmangur përdorimin e forcës ushtarake për shkak të pasojave të Luftës së Dytë Botërore, por me pushtimin e Ukrainës nga Rusia, kjo mendësi po ndryshon.
Kancelari Olaf Scholz shpalli një ndryshim të madh politik në vitin 2022, duke premtuar një investim prej 100 miliardë eurosh për të rritur fuqinë ushtarake të Gjermanisë.
Megjithatë, për gjeneralin Breuer, ky investim ende nuk është mjaftueshëm i madh. Ai ka paralajmëruar se ushtria gjermane ka mungesa të mëdha, duke përfshirë municionin, ushtarët dhe infrastrukturën, dhe ka nevojë për një mbështetje më të madhe financiare për të përballuar kërcënimin nga Rusia.
Gjermania ka përjetuar një ndryshim të mendësisë, me qytetarët që tani pranojnë se është e nevojshme të investohet në mbrojtje dhe siguri, duke parë situatën globale në një dritë të re. Por, ndonëse ka mbështetje për një ushtri më të fuqishme, ka ende kundërshtime për rikthimin e shërbimit ushtarak të detyrueshëm.
Gjenerali Breuer ka thënë se për të mbrojtur vetë Gjermaninë dhe perëndimin, vendi ka nevojë për 100,000 ushtarë të tjerë, përfshirë rekruta të rinj, dhe për këtë, një sistem i ri shërbimi ushtarak është i nevojshëm.
Në një kohë kur kërcënimet ruse janë gjithnjë e më reale, Gjermania ka vendosur të ndryshojë kursin dhe të përgatitet për një mundësi të mundshme lufte, për t’u siguruar që nuk do të përfundojë si një viktimë e agresionit të mundshëm.
