Gjermania ka siguruar vendin e parë në Grupin E të Kupës së Botës, pavarësisht humbjes 2-1 ndaj Ekuadorit. Skuadra e Julian Nagelsmann vazhdon në fazën e 1/16-ave si kryesuese e grupit, ndërsa Bregu i Fildishtë kalon më tej nga vendi i dytë pas fitores 2-0 ndaj Curaçaos.
Ekuadori, nga ana tjetër, arriti një fitore të madhe ndaj gjermanëve dhe me katër pikë siguroi kualifikimin si një nga vendet e treta më të mira. Goli vendimtar u shënua nga Gonzalo Plata në minutën e 77-të, pas një goditjeje nga këndi.
Gjermania e nisi mirë ndeshjen dhe kaloi në avantazh që në minutën e 8-të me Leroy Sané, pas asistimit të Florian Wirtz. Megjithatë, goli u shoqërua me polemika për një ndërhyrje të Pavlović në nisje të aksionit, por arbitri dhe VAR-i e konsideruan të rregullt.
Reagimi i Ekuadorit ishte i menjëhershëm. Vetëm dy minuta më vonë, Angulo barazoi rezultatin me një goditje të fortë me të majtën, duke mposhtur Manuel Neuer.
Në pjesën e dytë, Gjermanisë iu akordua fillimisht një penallti pas një ndërhyrjeje ndaj Kai Havertz, por vendimi u anulua pas rishikimit në VAR. Ekuadori fitoi besim me kalimin e minutave dhe në fund gjeti golin e fitores me Plata.
Në ndeshjen tjetër të grupit, Bregu i Fildishtë mposhti 2-0 Curaçaon dhe siguroi vendin e dytë. Protagonisti i afrikanëve ishte Nicolas Pépé, i cili realizoi dy herë dhe udhëhoqi skuadrën drejt kualifikimit.
Me këto rezultate, Gjermania kalon si kryesuese e Grupit E, Bregu i Fildishtë si vendi i dytë, ndërsa Ekuadori vazhdon aventurën në Botëror nga vendi i tretë.
