Kopshti zoologjik Tiergarten në qytetin gjerman të Nurembergut ka vrarë të martën 12 babunë të Guinesë, për shkak të mbipopullimit dhe mungesës së hapësirës në ambientet e kafshëve. Lajmi është konfirmuar pas mbylljes së papritur të kopshtit për “arsye operative”.
Vendimi për eliminimin e babunëve u paralajmërua që në shkurt 2024, pasi numri i tyre ishte rritur në 43, ndërsa godina ekzistuese ishte projektuar për 25 kafshë dhe të vegjlit e tyre. Sipas drejtuesve të kopshtit, ishin bërë përpjekje për t’i transferuar në kopshte të tjera në Evropë dhe Azi, por asnjë nga opsionet nuk u konkretizua për shkak të mungesës së kapaciteteve.
Të martën, aktivistë për të drejtat e kafshëve organizuan një protestë, ku disa prej tyre hynë me forcë në territorin e kopshtit dhe u ngjitën në tokë në shenjë kundërshtimi, përpara se të ndaloheshin nga policia. Organizatat thanë se do të padisin penalisht institucionin për vrasjen e kafshëve.
Zyrtarët e kopshtit thanë se ndër vite kishin provuar metoda të tjera si kontracepsioni për të menaxhuar popullsinë, por pa sukses. Ata theksojnë se konflikti mes kafshëve po bëhej i rrezikshëm dhe se nuk kishin më zgjidhje tjetër.
Ngjarja ka rikthyer debatin mbi praktikat e menaxhimit të kafshëve në kopshtet zoologjike evropiane, ku eutanazia për arsye hapësinore nuk është e pazakontë, megjithëse shpesh shoqërohet me reagime të forta publike.
